2025-жылдын 19–20-май күндөрү Кыргыз мамлекеттик медициналык академиясында (КГМА) Үй-бүлөлүк дарыгерлердин Бүткүл дүйнөлүк күнүнө арналган “Кыргызстан — үй-бүлөлүк медицинага жаңы көз караш” аттуу конференция өтүүдө. Иш-чаранын негизги темасы болуп, дүйнөлүк ураан “Саламат планета — саламат адамдар” тандалды.
Конференцияны Кыргыз Республикасынын саламаттыкты сактоо министри Эркин Чечейбаев ачып, өз сөзүндө үй-бүлөлүк медицинаны бекемдөө системасын өнүктүрүүнүн элдин ден соолугун жакшыртуудагы маанилүүлүгүн белгиледи. Ошондой эле, профессор Нурлан Бримкулов (КГМА ДиПДО кафедрасы) жана Дүйнөлүк саламаттыкты сактоо уюмунун өкүлү доктор Ливиу Ведраско куттуктоо сөздөрү менен чыгышты.
Конференциянын биринчи күнүндө үй-бүлөлүк медицинанын актуалдуу маселелери боюнча алдыңкы адистердин баяндамалары угулду. Алардын ичинде профессор Мейкин Усубалиевдин аллергодерматоздор боюнча доклады жана профессор Нурлан Бримкуловдун бронхиалдык астма боюнча GINA-2025 жетекчилигинин жаңылыктары тууралуу маалыматы бар эле. Балдардын вирусдук диареяларындагы сезгенүү маркерлеринин практикалык мааниси (ассистент Беделбаев М.К.) боюнча баяндамага өзгөчө көңүл бурулду.
Күндүн экинчи жарымында дагы бир катар маанилүү темалар боюнча баяндамалар уланды: кант диабети (доктор Патрик Ченг), жүрөк-кан тамыр ооруларынын эпидемиологиясы (ассистент Кушубеков Д.К.), үй-бүлөлүк дарыгерлерди региондорго бөлүштүрүү (ассистент Ботбаева Э.И.) жана паллиативдик жардамды өнүктүрүү (доктор Сабырбекова Т.С.). Иш-чара ординатор Кемелова А. тарабынан сунушталган клиникалык учурду талдоо менен аяктады.
20-майда КГМАнын жайкы аянтчасында иш-чаранын салтанаттуу ачылышы болот. Күн функционалдык машыгуулар менен уланып, үй-бүлөлүк дарыгерлердин практикалык көндүмдөрүн өркүндөтүүгө багытталат. Программа «Кыргыз Республикасында үй-бүлөлүк медицина ассоциацияларынын абалы жана өнүгүү перспективалары» деген темада тегерек стол менен жыйынтыкталат.
Конференция сертификаттарды тапшырган салтанаттуу азем менен аяктайт. Бул иш-чара үй-бүлөлүк медицинадагы заманбап чакырыктарды талкуулоо, тажрыйба алмашуу жана Кыргызстандын дарыгерлер коомчулугунун өнүгүүсү үчүн уникалдуу мүмкүнчүлүк болуп калды.